„Со претседателот на Сојузот на специјални едукатори и рехабилитатори Горан Петрушев и проф. Буниамин Мемеди, разговаравме за обезбедување поуспешна образовна инклузија и како заеднички да придонесеме во градењето на општество на еднакви можности, во кое децата со посебни образовни потреби ќе бидат еднакви со сите други деца.

Нивната стручна поддршка ќе помогне и за сензибилизирање на јавноста, посебно на родителите, за прифаќање на различностите и правото на секој ученик да посетува училиште кое е најблиску до местото каде живее.

Заедничка е заложбата за повеќе специјални едукатори и логопеди во образовниот процес како и за зголемување на бројот на образовни и лични асистенти, како услов за поголема вклученост на децата со посебни образовни потреби во редовна настава.

Наша цел е преку инклузивно образование да обезбедиме најдобри развојни постигнувања за секое дете со посебни потреби. Затоа ни е важно вклучувањето на стручните лица во развивањето на позитивен општествен став кон инклузијата, надминување на неоснованите стравови кај родителите и претворање на отпорот кон различностите во прифаќање. Преку образованието градиме личности со емпатија и толеранција.“